Канон Исусу Христу (умилительный)

Творение святого Феоктиста
инока Студийской обители

Тропарь, глас 6-й

Помилуй нас Господи, помилуй нас, всякого бо ответа недоумеюще, сию Ти молитву яко Владыце, грешнии раби Твои приносим, помилуй нас Господи, помилуй нас.

Слава. Господи помилуй нас, на Тя бо уповахом. Не прогневайся на ны зело, ниже помяни беззаконии наших: но призри на ны яко Милосерд, и избави нас от враг наших: Ты бо еси Бог наш, и мы людие Твои, и вси дела руку Твоею, и имя Твое призываем.

И ныне. Богородичен. Милосердия двери отверзи нам, благословеная Богородице Дево, надеющиися на Тя не погибнем, но да избавимся Тобою от бед: Ты бо еси спасение роду христианскому.

КАНОН, глас 2-й

Песнь 1. Ирмос. Во глубине потопи древле, фараонитская вся воинства, преоружену силу: воплощьжеся Слово преуспеющыя грехи потребило есть, преславныи Господь, яко прославися.

Запев: Господи Исусе Христе Сыне Божии помилуй мя грешнаго (поклон)

Исусе Сладкий Христе, Исусе долготерпеливе, душевныя ми язвы исцели Исусе, и услади сердце мое Многомилостиве молюся, Исусе Спасе мой, да величаю Тя спасаемь.

Запев. Исусе сладкий Христе, Исусе отверзи ми покаяния дверь, Человеколюбче Исусе, и приими мя Тебе припадающа тепле, и просяща, Исусе Спасе мой согрешением прощения.

Слава. Исусе сладкий Христе, Исусе исхити мя из руки лукаваго стрельца, Исусе сотвори мя деснаго предстоятеля славе Твоей, Исусе Спасе мой, части шуих мя избави.

И ныне. Исуса рождьшая Бога, Владычице моли о непотребных рабех Ти Пречистая, яко да муки молитвами Ти нескверная избавльшеся осквернении, и славы присносущныя восприимем.

Катавасия: Сохрани от бед рабы Своя Милостиве, яко усердно к Тебе прибегаем к милостивому Избавителю и всех Владыце Господу Исусу (поклон). Господи помилуй (3 раза с поклонами).

Песнь 3. Ирмос. На камени мя веры утверди, разшири уста моя на враги моя. Возвеселибося дух мой воспевати, несть свята яко же Бог наш, и несть праведна паче Тебе Господи.

Запев. Услыши Человеколюбче Исусе раба Твоего, вопиюща во умилении, и избави мя Исусе при и мучения, едине долготерпеливе, Исусе пресладкии и многомилостиве.

Запев. Подъими раба Твоего Исусе мой, припадающа со слезами ногам Твоим, и спаси Исусе мой кающася, и геены мя Владыко избави, Исусе пресладкии и многомилостиве.

Слава. Время Исусе, еже ми дал еси, в страстех изжих Исусе мой. Тем же Исусе мой не отверзи, но призови мя молюся Владыко, Исусе пресладкии, и спаси мя.

И ныне. Дево рождьшая Исуса моего, моли избавити мя геены, едина предстательнице печальным богоблагодатная, и сподоби мя жизни Всенепорочная нестареющейся. Катавасия.

Седален, глас 1-й. Спасе мой Исусе, иже блуднаго спасыи, Спасе мой Исусе, приемыи блудницу, и мене ныне помилуй, Исусе мой многомилостиве. Спаси и ущедри, о Исусе благодателю, яко же благосерде Манасию Исусе мой, яко един Человеколюбец.

Слава и ныне. Молитвы своих раб приими Богородице, и избави ны от всякия беды, яко рождьшая Христа Спаса, Избавителя душам нашим.

Песнь 4. Ирмос. Пришествовав от Девы, не ходатай ни ангел, но Ты Сам Господи воплощься, и спасе всего мя человека. Тем вопию Ти, слава силе Твоей.

Запев. Исцели Исусе мой, души моея язвы, Исусе мой молюся, из руки исхити мя Исусе мой благоутробне, душетленнаго стрельца, и спаси мя.

Запев. Согреших Исусе мой, пресладкий милосерде, Исусе мой спаси мя, прибегающаго покрову Твоему. Исусе долготерпеливе, и царствию Твоему мы сподоби.

Слава. Не согреших Исусе мой никто же, яко же аз согреших окаянныи: но припадая молюся, Исусе мой спаси мя, и жизни вечныя Исусе мой наследие ми даруй.

И ныне. Всепетая, Исуса рождьшая Господа, Того моли избавити муки, вся поющыя Тя, и Богородицу воистину именующыя. Катавасия.

Песнь 5. Ирмос. Просвещение во тме лежащым, и спасение неначаемым Христе Спасе мой, к Тебе утреннюю, Царю мирныи, просвети мы сиянием си, иного бо разве Тебе Бога не знаем.

Запев. Ты просвещение Исусе уму моему, Ты спасение отчаянней души моей Спасе. Ты Исусе мой муки избави, и геены мя зовуща: спаси Исусе мой Христе, мене окаяннаго.

Запев. Весь отнюд Исусе мой, к страстем безчестия низвержен ныне зову, Ты Исусе мой, помощи ми руку низпослав, исторгни зовуща: спаси мя, Исусе мой Христе, окаяннаго.

Слава. Осквернен ум Исусе мой, обношу и взываю Ти: очисти мя от скверны блужения, Ты Исусе мой, иже во глубину злобы от неразумия низпоползшагося, Спасе мой, и спаси мы молюся.

И ныне. Исуса рождьшая Дево богородительнице, Того умоли, спасти вся правосланыя, иноки и мирския, и геены избавити зовущыя: разве Тебе предстательницу тверду не знаем. Катавасия.

Песнь 6. Ирмос. В бездне греховней одержимь, неизследную милосердия Твоего призываю бездну, от тли Боже мя возведи.

Запев. Исусе мой Христе многомилостиве, исповедающася приими мя Владыко. О Исусе спаси мя, и от тли Исусе мой исхити.

Запев. Исусе мой, не бысть ин блудник ни кто же, яко же аз страстныи, о Исусе Человеколюбче, но Ты Исусе мя спаси.

Слава. Исусе мой, блудницу и блуднаго, и Манасию и мытаря преидох страстьми, и разбойника и неневитяны: но милостию Твоею и мене, о Исусе мой, помилуй и спаси.

И ныне. Исуса Христа моего рождьшая Пречистая Дево, едина нескверная, осквернена мя суща, молитв Твоих иссопом очисти. Катавасия.

Кондак, глас 6-й. Исусе Спасе, очисти и спаси мя, яко же иногда блудницу, разбойника же и блуднаго. И мене ныне помилуй всещедре и благосерде Господи, и муки избави мя , молением Пречистыя Ти и всепетыя Богоматери.

Икос. Земная и временная возлюбих, вечных благ лишихся, Христе Исусе, едине Человеколюбче, грешником неотсекаемая надежда: но милость кающимся пролия, и мене ныне кающася не презри Исусе, разумею бо разбойника исповеданием спасена, и мытаря милостию очищена, тако и блудницу помышляю плакавшуся. Яко всем сих положил еси образы покаяния: претиши бо милостивне, и милосердуеши. Тепле кающася видиши, и противу течеши яко Отец. Аще убо восхощеши, мощен бо еси и моя отпустити грехи, ими же по крещением обете осквернихся, и по обещании христианского (иноческаго) жития. Но чистоту яко Бог подаждь ми, молением Пречистыя Ти и всепетыя Богоматери.

Песнь 7. Ирмос. О теле злате, на поле Деире служимем, трие отроцы не радиша о безбожнем велении, но посреди пламени ввержени, прохлаждаеми пояху, благословен Бог отец наших.

Запев. Христе Исусе, никтоже согреши на земли о века, о Исусе, яко же согреших аз окаянныи и блудныи. Тем же Исусе мой вопию Ти, поюща мя ущедри, благословен еси Господи Боже отец наших.

Запев. Христе Исусе, от страха Твоего вопию, пригвозди мя, о Исусе мой, и окорми ныне ко пристанищу благоутишному. Яко да Исусе мой щедре пою Ти спасаемь, благословен еси Боже отец наших.

Слава. Христе Исусе, тмами обещахтися, о Исусе мой, покаятися, но солгах страстныи и окаянныи. Тем же Исусе мой вопию Ти, нечуственне пребывшую душу мою просвети Христе, отцем Боже благословен еси.

И ныне. Христа Исуса рождьшая странно, и выше естества. Того моли Всенепорочная, яже чрез естественная моя согрешения вся простити ми Отроковице. Да зову Ти спасаемь, благословена еси яже Бога плотию рождьшая. Катавасия.

Песнь 8. Ирмос. В пещь огненную к детем еврейским сошедшаго, и пламень на хлад преложшаго Бога, пойте вся дела Господа, и превозносите Его во веки.

Запев. Тя Исусе мой молю, яко же блудницу Исусе мой, избавил еси многих прегрешении, тако и мене Исусе Христе мой избави, и очисти оскверненную душу мою, Исусе мой.

Запев. Преклонихся Исусе безсловесными сластьми, безсловесен явихся, и скотом воистину, о Исусе мой Спасе, страстно окаянныи уподобихся. Тем же Исусе безсловесия мя избави.

Слава. Впад о Исусе в душетленныя разбойники, обнажихся одежды Исусе мой боготканныя, и лежу ранами уязвен. Масло Христе возлей на мя и вино.

И ныне. Исуса моего и Бога, носившая Христа несказанно, Богородице Марие, Того моли присно, от бед спастися рабу Твоему, и певцем Твоим, неискусомужная Дево. Катавасия.

Песнь 9. Ирмос. Иже от Бога Бога Слова, неизреченною мудростию, пришедшаго обновити Адама, ядию тления падшаго зле. От святыя же Девицы неизреченно воплощаема нас ради, вернии единомудренно, песньми величаем.

Запев с поклоном. Манасию Исусе мой, мытаря, блудницу и блуднаго, щедре Исусе, и разбойника преминух Исусе мой, в делех студных и безместных Исусе. Но Ты Исусе мой предварив мя спаси.

Запев. Иже от Адама Исусе мой, согрешившыя вся прежде закона, и в законе Исусе, и по законе Исусе мой, и по благодати, преминух страстьми окаянно. Но ты Исусе мой, судьбами си спаси мя.

Слава. Да не отлучен буду Исусе мой, неизреченныя Ти славы, да не получу части шуия, сладкий Исусе. Но Ты мя десным овцам Твоим Христе Исусе мой счетав покой, яко милосерд.

И ныне. Исуса Богородице, Его же носила еси, едина неискусомужная Дево Марие. Того Чистая умоли, яко Сына Своего и Зиждителя, избавити вся притекающыя к Тебе, искушении бед, и огня будущаго. Катавасия.

Отпуст: Господи Исусе Христе, Сыне Божии, молитв ради Пречистыя Твоея Матере, и всех ради святых, помилуй и спаси нас, яко Благ и Человеколюбец. Аминь.

Данный канон можно приобрести в печатном виде в нашей иконописной мастерской.